Erre ipurdi erre!

Urte berria ongi hasteko, urte zaharreko kontu txarrak sutan erre behar dira. Edo, behintzat, hori da Agurainen egiten dutena, antzinako usadioa berreskuratuz. Izan ere, gaur arratsaldeko 19:00ak aldera, Urtezaharra ospatzeko Errepuierre izeneko festa egingo dute, Madura auzoan.  

Errepuierre hitzak euskaratik dator, eta erre ipurdi erre esan nahi du. Behiala, etxean zeuden traste zahar guztiak bildu egiten zituzten, eta  gero sua pizten zuten. Bien bitartean,  gazteak herritik zehar ibiltzen ziren, Galerre izeneko panpina besoetan hartuta zutela, honako hau abestuz:

¡Errepuierre,

quémale el culo a Galerre,

Errepuierrón,

quémale el culo a don Simón!   

Ondoren, Galerre  traste zahar horiekin egindako mendiko tontorrean kokatzen zuten. Baina, urteko uzta txarra izan bazen, panpina buruz behera jartzen zuten. Aldiz, urtean zehar bildutako uztak onak izan baziren, Galerre buruz gora ipintzen zuten.

Arabako herri askotan dagoeneko ohitura hau galdu den arren, Agurainen gero eta gehiago dira suaren sugarrak ikustera bertaratzen direnak.  

Barrundiako larunbateko aisialdi programa

Datorren urtean Barrundiako gaztetxoek ez dute aspertzeko astirik izango. Izan ere, hamaika ekintza prestatu dituzte 9 eta 15 urte bitarteko umeentzat. Hauek izango dira, besteak beste, Barrundiako kiroldegian (Ozaetan) burutuko diren jarduerak: kirol anitzak, zientzia tailerrak, magia trukuak, zirkoa, puzzleak, musika tailerrak, gaztelu puzgarriak eta pertsona elbarrituek bere bizitza nola igarotzen duten ere ikasiko da.

Ekintza guztiak euskaraz izango dira, eta hilean bitan gauzatuko dira. Ordutegia oraindik ez dago guztiz finkatuta, eta horregatik bi aukera ematen dira: alde batetik, ekintzak ostiraletan arratsaldeko 18:00etatik 20:00ak arte izango litzateke, edo bestela larunbatetan goizeko 11:00etatik eguerdiko 13:00a arte. Beraz, azkenean jende gehiago izena ematen duen ordutegia burutuko da.

Bertso abentura Ozaetan

Asparrengo gaztetxoen artean euskararen erabilera bultzatzeko helburuarekin, bertso barnetegi bat antolatu da, 8-12 urte bitarteko umeentzat. Egonaldia Barriako aterpetxean izango da,  2011ko urtarrilaren 3, 4 eta 5ean.

Ekintza hau Arabako Bertsozale Elkarteak, Asparrengo udalak eta Lautadako Bertso Eskolak antolatu dute, eta bere xede nagusia euskararen erregistrorik ludikoena garatzea eta ondare kulturala sakonago ezagutzea da.

Abentura hau urtarrilaren 3an Ozaetako elizaren aurrean eguerdiko 12:00etan hasiko da, eta bi egun geroago, hots, urtarrilaren 5ean toki eta ordu berean bukatuko da.

Denboraleak Europako aireportuak eten ditu

Bruselako aireportua asteazkenera arte itxiko dute, izotzaren aurkako likidorik gabe geratuko direla aurreikusi baitute. Dena den, badirudi Europa astintzen duen denboralea poliki-poliki baretzen ari dela. Gaur egoera hobera joan da, eta Londreseko Heathroweko aireportutik ehun hegaldi inguru aireratzea lortuko dute. Hala eta guztiz ere, oraindik atzerapenak nagusi izango dira, asteburu osoan zehar bertan behera geratu ziren hegaldi guztiengatik.

Europako denboralearen ondorioak Estatura iritsi dira

Asteburu honetan zehar, hotza eta elurraren eraginez Loiuko aireportuan hamar hegaldi bertan behera gelditu dira, eta Estatuko gainerakoetan ehun baino gehiago izan dira.

Espainiako aireportuetan Frantzia, Alemania, Italia eta Erresuma Batuarekin dauden loturak dira arazo gehien eman dituztenak. Izan ere, Frantziarekin 55 hegaldi bertan behera utzi dituzte, Alemaniarekin 24, Italiarekin 4 eta Erresuma Batuarekin 85.

Handik hona

Jende askok edozein oporraldi Euskal Herrian zehar dauden txoko miresgarriak bisitatzeko aprobetxatzen du. Baina, beste batzuek, tamalez, ezin dute nahi beste bidaiatu. Horregatik, Multimedia Komunikazioa Masterreko ikasleok gure inguruan dauden toki ikusgarri horiek bisitatzeko aukera eskaini nahi dizuegu, Handik hona izeneko podcastaren bidez.

Oraindik bidaia guztiak prestatzen gabiltza, baina laster gure hitzen eta zuen irudimenari esker Euskal Herrian zehar handik hona ibiliko gara.

Laster arte!

Barrundiako Gabeonetako egitarauaren izarra Olentzero da

Eguberriak iristear dira, eta urtero moduan Barrundiako udalak Gabonetako egitaraua prest du. Dena den, ekintza guztietatik garrantzitsuena Olentzeroren jaia izango da.

Martxa hartzeko, ostiral honetan bertan (abenduaren 17an) “Antzokiko Istorioak” izeneko ipuin kontaketak egon dira, arratsaldeko 18:00etan Barrundiako liburutegian, Ozaetan.

Hala eta guztiz ere, ezin dugu ahaztu etxeko txikientzat Eguberrietako hitzordurik inportanteena Olentzerorekin dutena dela. Betiko moduan, abenduaren 24an goizeko 10:30etatik hasita, ikazkina Barrundiako herri guztietatik pasatuko da umeekin hitz egitera eta haien gutunak jasotzera.

Ondoren, arratsaldeko 18:00etan, Olentzeroren jaia ospatuko da Hermuan. Bertan, Olentzerori ongietorria emango zaio txalaparta joz eta aurreskua dantzatuz. Gainera, gaztaina erreak, txokolatea, txistorra eta ardo beroa ere egongo dira. Aurreko urteetan bezala, aurten ere neska-mutilak baserritarrez jantzita etor daitezke festara.

Txindurritegia eraikitzen

Betidanik inurriak intsekturik langileenak direla entzun dugu. Beren tamaina dela eta, gainerako animalia batek ia nekatu barik egin dezakeen lana, hauei bikoitza kostatzen zaie. Baina inurriek badakite taldean, hots, guztiak batera, lan egitea zein garrantzitsua den, eta poliki-poliki haien helburua betetzea lortzen dute.

Antzeko zerbait gertatzen zaie Txindurri irratiko kideei. Txindurri irratia Lautadatik eta Lautadarentzat jaiotzear den hedabide berria da. Pausoz pauso, proiektu honetan parte hartzen duten inurrien nahiak betetzen ari dira, baina, hala eta guztiz ere, oraindik eginbeharreko bidea oso luzea da. Horregatik, Arabako Lautadako herritarren laguntza ezinbestekoa da.

Duela hilabete gutxi, komunikabidearen egoitzaren giltzak lortu zituzten,  eta bertan hautsa kentzeko premia zuten altzari asko topatu zuten. Hori dela medio, haien bizileku berria txukuntzen laguntzeko eskaera luzatu dute, modu horretan txindurritegia eraikitzen hasteko. Beraz, badakizue, bihar, azaroaren 20an goizeko 11:30etan Aguraingo Santa Maria plazan hitzordua duzue, guztion artean Lautadako ahotsa entzun dadin lortuko baitugu!

Urdinetik arrosara

Bidaia erotiko bat egitera goaz, baina zer sartu behar da maletan? Edonor arnasarik gabe uzteko ahalmena duten kulero edota galtzontzilo gorriak? Ala kaxoi barnean ahaztuta dugun lehoinabar tanga hori?  Edo, zuzenean barneko arroparik gabe joango gara? Hau buruhauste hau! Argi dagoen gauza bakarra mota honetako bidaiak egiteko lotsak, ikarak eta beldur eszenikoak maletatik kanpo geratu behar direla da.

Urdinetik arrosara izeneko bidaia erotikoak aukera paregabea eskaintzen du sexuazio prozesua (hots, gizon ala emakume nola egiten garen), gizartean dagoen sexu eta amodio ereduak, edota fantasiak bezalako gaiak jorratu eta haien inguruan hausnarketa egiteko. Gainera, bidaiari bakoitzak nahi duen heinean sartuko da dinamiketan. Horregatik,  nahi dituen pentsamendu, sentsazio eta sentimenduak gainontzekoekin partekatu dezake, baina baita barnean gorde ere.  

Tailerra Agurainen atzo goizean hasi bazen ere, azaroaren 20 eta 27an, goizeko 9:30etatik eguerdiko 14:30ak arte, jarraituko du.

Beraz… bidaia ona eduki!

Mundua 7 koloretan

Telebistarako bertsioa:

Interneterako bertsioa:

Zazpi. Horiek dira mundu honek dituen kolore kopurua. Jon Arretxe, behintzat, modu horretan sailkatu ditu bere bidaietan bizi izandako istorioak. 50 minutuetan Barrundiako udaletxeko liburutegian (Ozaetan) ikuskizun konbinatu bat aurkeztu zuen atzo, Euskaren Egunerako antolatutako programaren barnean.

Beltza. Horixe da ikuskizunaren lehen kolorea, beltzak Mendebaldeko heriotza etsigarria islatzen baitu. Ondoren, ikus-entzunezkoa gris bihurtzen da, narratzaileak Indiako emakume triste baten istorioa kontatzen duen bitartean. Arretxek beti bakarrik joan da leku guztietara, bidaia lagunik gabe gauzak intentsiboago bizi direlako. Horregatik,  zenbaitetan gorriak ikusi ditu, eta istorio horiek guztiak arriskua, beldurra edota odolaren kolorean, gorrian alegia, sartu ditu. Atzo, esaterako, Amazonaseko oihanean bakar-bakarrik zegoela ia-ia jaguarrek jan zuteneko pasartea irakurri zuen.

Horrela, poliki-poliki, ikuskizuna argitzen doa, horia eguzkiaren kolorea baita. Baina baita zoroena ere, eta hurrengo pasartea Saharako basamortuko oasi batean topatu zuen gizon batean oinarritzen da. Baina ez pentsa mundu honetan dena iluna denik, itxaropenerako lekua ere baitago. Hortaz, berdea den atalean, Saharan izandako beste bizipen bat irakurri zuen. Eta esperantzaren koloretik, bakearen kolorera pasatuko gara,   Amazoniaren erdian harmonia osoan bizi den jendearen istorioa urdinez margotu baitzuen.

Ikus-entzunezko hau hasi den moduan bukatzen dela esan daiteke, azken kolorea zuria baita, hots, Ekialdeko heriotza itxaropentsuaren kolorea. Hala eta guztiz ere, Arretxeren bidaietako argazkirik onenekin batera Cristina Fernandez marrazkilariaren irudiak ikusita, eta musika egokia eta Zazpi kolore liburuko pasarteen zuzeneko irakurketak entzun ondoren, desberdintasunak desberdintasun, han eta hemen antzeko arazoak, desirak eta sentimenduak daudela antzeman daiteke. Agian, hortxe bertan dago bizitzaren xarma.

Irratirako bertsioa:

Oharra: barkatu eragozpenak, baina arazo teknikoak direla eta Jon Arretxeren hitzak gaizki entzuten dira.

Berezko izaerarekin

Galeper entsalada eskabetxean, onddo-krepak, pagausoa ehiza-saltsan, Idiazabal gazta, intxaurrak eta etxeko irasagarra. Gaurtik hasita,  eta hurrengo bi asteburuetan zehar, hots azaroaren 28a arte, hori da Lautadako I. Jardunaldi Gastronomikoetan dastatu daitekeen menuetako bat.

Lautada pasabide eta elkargune garrantzitsua izanik, kultur-ondare handiko lurraldea da, gastronomia barne. Bertako sukaldaritzak, batez ere,  lurretik ateratako elikagaiak izaten du ardatz, eta sasoian sasoiko produktuetan du oinarria. I Jardunaldi gastronomiko hauetan onddoak, perretxikoak, ehiza eta gazta aurkeztuko dira. Hauek dira ekitaldi honetan parte hartzen duten jatetxeak: Agurainen Zerua eta Jose Mari jatetxeak, Araian sagardotegia eta Zubigain, Argomanizen Paradorea eta Dulantzin Meson Erausquyn jatetxea.

Eta Lautadako zaporeaz gozatzen jarraitzeko  jardunaldi hauetan beste ekintza batzuk antolatu dituzte: azaroaren 13an, esaterako, Lautadako-produktuen azoka egongo da Donemiliagako kiroldegian (Erdoñanan); azaroaren 16an, Aguraingo Zabalarte Etxean gazta dastatzea izango da; azaroaren 23an, ordea, Fernando Gonzalez de Heredia gastronomoak “Lautada, berezko izaera duen gastronomia” izeneko hitzaldia emango du Araian; eta azkenik, azaroaren 30ean Argomanizeko Paradorean gazta, ehiza, perretxiko eta onddo dastatzea egongo da.

Zine foruma Ozaetan

Meteorologoek dioten moduan, badirudi biharko Euskal Herrira bisitan etorri den denboralea poliki-poliki alde egingo duela. Eta bazen garaia, lauzpabost egun daramatzagulako euri zaparrada eta haize bolada bortitzen artean.

Beraz, zer egin eguraldi kaskar honi aurre egiteko? Ba, egia esan, hoberena etxean gelditzea litzateke. Baina, GaraiON NaturArtekoek plan ederra proposatzen digute udazkeneko asteazken arratsaldeak primeran pasatzeko: zine foruma.

Hortaz, badakizue, gaur bertan, arratsaldeko 18:30etan Ozaetan, Barrundiako udaletxearen ondoan Kutxidazu bidea Ixabel filma lagunartean ikusteko hitzordua duzue.

Gariren 16 loreak

Ezustean. Horrela geratu ziren Hertzainak taldeko abeslari ohia entzutera Araiaraino abiatu zirenak, eskenatoki gainean guztiz eraberritu den kantaria topatu baitzuten. Izan ere, Gariren azken lanean, bere abesti batek dioen moduan, “ezer ez da berdin”.

Araiako Urte Bukaera Musikalaren XVIII. edizioaren barruan, Garik 16 lore izeneko bilduma aurkeztu zuen atzo arratsaldean Andra Mari Aretoa bete zuten jarraitzaileen aurrean. Artista honen azken lanak balio sinboliko pertsonal handia duten hamasei abesti jasotzen ditu. Baina bertan, abeslari legazpiarraren garapen artistikoaren urrats berria antzeman dezakegu, kantek, hainbat moldaketa jaso ondoren, berriak direla baitirudite. Aitormena, esate baterako, aldaketa sakona jasan duen abestietako bat da.

Eta artista honek bere ibilbide luzean zehar landatutako loreak aurkeztera joan zenez, hona hemen Amapola izeneko abestiaren bideoa.

Atzo Garik bere izpiritu berria plazaratzeko, taula gainean Miguel Moyano gitarra-jolearen laguntza izan zuen. Gainera, bi artista hauen atzean musikarekin bat zetozen irudiek publikoa amets egitera gonbidatzen zuten. Gauzak horrela,  ordu eta erdiko kontzertuaren ondoren, eta Araiako German Maria Landazabal Musika Elkarteak emandako oparia esku artean zuelarik,  behin eta berriz “txintxo ibili” errepikatuz, Gari eskenatokiaren atzeko aldean ezkutatu zen.

Soinuz soinu

Hona hemen gaur bertan klasean egin dugun soinuen bidezko istorioa. Ea gustatzen zaizuen!

Aguraingo Eskualdeko I. Narrazio Lehiaketa

Pasa den igandean, hots, urriaren 24an, Liburutegien Eguna ospatu zen. Aguraingo Eskualdeko udalerrietan dauden liburutegi gehienak nahiko txikiak izan arren, bizirik daudela jakitera eman nahi dute. Horretarako, Literatur zaletasuna euskaraz bultzatzeko izeneko kanpainaren barruan, hainbat jarduera antolatu dituzte euskal literatura herritarrengana hurbiltzeko asmoz. Ekintza horien artean, besteak beste, ipuin kontalariak, euskal idazleen hitzaldiak eta monologoak egongo dira. Baina, kanpaina honen ardatza Aguraingo Eskualdeko I. Narrazio Lehiaketa izango da.

Narrazio lehiaketa honetan 16 urte gorako edozein lagun parte har dezake. Lanak euskaraz idatziak izan behar dira, eta gaia librea izango da. Obrak Aguraingo Eskualdeko bulegoetan zein udalerriko Udaletxeetan (hots, Asparrenan, Agurainen, Barrundian, Burgerlun, Donemiliagan, Dulantzin, Iruraiz-Gaunan eta Zalduondon)  azaroaren 26a baino lehen aurkeztu behar dira.

Hemendik ekimen honetan parte hartzera animatu nahi zaituztegu, irabazleak 300 euroko saria jasoko baitu!

Euskara plazara dantzara

Askotan entzun dugun moduan, hizkuntza bat ez da galtzen ez dakitenek ikasten ez dutelako, dakitenek hitz egiten ez dutelako baizik. Barrundiako aldean ez dute hori gertatzea nahi, eta horregatik, aurten ere Euskararen Eguna martxan jarri dute.

Ekitaldia berotzen hasteko, azaroaren 5ean, arratsaldeko 20:00etan Barrundiako Udalean (Ozaetan), Jon Arretxek bidaiei inguruko ikus-entzunezkoa aurkeztuko du.  Mundua zazpi koloretan izeneko ikuskizunak Arretxeren bidaietako argazkirik onenak, Cristina Fernandez marrazkilariaren irudiak, musika eta Zazpi Kolore liburuko pasarteen zuzeneko irakurketak konbinatzen ditu.  

Hala eta guztiz ere, benetako festa hurrengo egunean, hots, azaroaren 6an Marietako kiroldegian izango da. Egun guztian zehar gaztelu puzgarriak izango dira bertan, eta 12:00etan umeen pilota partidak hasiko dira. Eguerdiko 15:00etan herri bazkaria izango da, eta ondoren, arratsaldeko 16:30ak aldera, bertsolariak egongo dira. Azkenik, Barrundiako Euskararen Egunari amaiera dantzatzen emango diogu,  Jotafa taldearen eskutik dantza-plaza izango baita.

Blogen analisia

Internetekin batera komunikatzeko era berria jaio da. Modu horretan,  ziberkazetaritzak sarearen beste aldean dagoen irakurlea aktiboa bilakatzeko duen erremintarik garrantzitsuenetariko bat blogak dira.

Blogen analisia egiteko, ondorengo bitakora hauek aztertu ditut: lehena, Joseba Martín kazetariarena izan da. Bertan, zinemari buruz aritzen da, eta blogaren izena Culocortos da (http://blogs.elcorreo.com/culocortos/posts) . Bigarrenak, De sentido común izena du, (http://blogs.elcorreo.com/sentido-comun/posts) eta Jon Martínez Elizari buruz mintzatzen da. Kulturari buruzko bloga Divergencias deitzen da, (http://blogs.elcorreo.com/divergencias/posts)  eta bere egilea César Coca da. Juanan Bilbaok El amigo de Moe izeneko blogan (http://blogs.elcorreo.com/el-amigo-de-moe/posts) batez ere ardoaren gaia jorratzen du. Eta azkenik, Edurne Pasabanen bitakora ere ikertu dut (http://blogs.diariovasco.com/pasaban). Izenburua Desde la cima da, eta bertan, Pasabanek bere espedizioak kontatzen ditu.

Arestian aipatutako lehen lau blogak Elcorreo.com-ekoak dira, hortaz, guztien parametroak antzekoak dira: ez dute publizitaterik, argazkiak eta bideoak dituzte (kanpokoak, gehienak Youtubetik ateratakoak), artxiboa dute, bertara harpidetu daiteke, harremanetan jartzeko formularioa bete behar da,  eta normalean, ez dute audiorik erabiltzen. Edurne Pasabanen bitakora, aldiz, Diariovasco.com-etik aterata da, eta Pasaban alpinista famatua denez, bere bloga gainontzekoetatik aldentzen den bakarra izan da.

Esaterako, trackbacka du, baina ez du artxiborik.

Bideoekin gertatzen zen moduan, normalean, blogariek argazkiak kanpotik ateratzen dituzte, hots, ez dira beraienak. Edurne Pasabanen bitakoran, ordea, bera eta bere taldekideak agertzen dira. Horrek, testua eta argazkiaren arteko lotura estutzen duela iruditzen zait, eta gainera, argazkiak testuari sinesgarritasun gehiago ematen diola pentsatzen dut.  

Orokorrean blogariei buruzko informazio gutxi ematen da. Hau da, post guztietan egileak sinatzen duen arren, irakurleak ez daki igorlea profesionala (kazetaria) den edo ez. Edurne Pasaban-en kasuan ere, gauza bera gertatzen da. Nahiz eta pertsonaia ezaguna izan, bertan ez da bere lorpenei buruzko daturik ematen. Hortaz, hartzaileak informazio horren bila blogetik kanpo jo behar du. Nire ustez, datu batzuk jarri beharko ziren, igorle eta hartzailearen artean harreman zuzenagoa sortzeko.

Bestalde, aztertu ditudan blog guztietan ez da zenbat jende sartzen den zenbatzen, eta nire aburuz, datu hori bitakora bat arrakastatsua den edo ez jakiteko baliagarria izan daiteke.

Azkenik, ikertu ditudanen artean, iruzkin gehien dituzten blogak Edurne Pasaban eta Jon Martínez-renak dira. Pasabanen kasua, normala iruditzen zait, izan ere, lorpen handiak lortu dituen alpinista bat da. Jon Martínez, aldiz, ez da egunero albistegietan ateratzen den pertsona. Are gutxiago, berari buruzko informazioa topatzea ez hain erraza. Baina, oihartzuna eta polemikoak diren gaiak jorratzen ditu, eta horrek, bere aldeko eta kontrako komentario asko jasotzea eragiten du. Beraz, blog bat arrakastatsua izatea nahi baldin badugu, eta era berean, gure helburua irakurlea pasibo izatetik aktibo izatera pasatzea baldin bada, hobe dugu polemikoak diren, edota gainerako blogariek idazten ez dituzten gaiak lantzea.

Gari eta Xabier de Felipe musikarien doinuak entzungai izango dira Araian

Hilabete gutxi falta dira urtea bukatzeko, eta hori Araiako herrian antzeman daiteke. Izan ere, urriaren 23tik hasita, abenduaren 19ra arte, herriko Andra Mari Aretoa musikaz beteko da XVIII. Urte-Bukaera Musikala ospatzeko. Bertan, arratsaldeko 20:15etatik aurrera, mota desberdinetako erritmoak entzun ahal izango dira; besteak beste, perkusioa, jazza, melodia klasikoak edota Erdi Aroko musika.

German Maria Landazabal Musika Elkarteak ez die ekitaldi honen jarraitzaile sutsuei hutsik egin nahi, eta horregatik, aurten ere programa borobil bat antolatu du. The Percu´s Band perkursio taldeak jaialdiari hasiera emango dio euren danborren hotsekin.  Zazpi egun geroago, hots, urriaren 30ean, Adela Martín eta Anna Przylecka euren piano eta biolinaren bidez publikoa erlaxatzen ahaleginduko dira.

Datorren hilabetean jaialdi honek bi euskal musikari nabarmenen bisita izango du. Alde batetik, azaroaren 6an, Garik, Hertzainak taldeko kide ohiak, bere azken laneko abestiak kantatuko ditu Araiara hurbiltzen diren jarraitzaileen aurrean. Eta beste alde batetik, Xabier de Felipe, Nacho de Feliperen semea, hilaren 13an gerturatuko da Andra Mari Aretora. Baina, biolinista gazte honek ez da bakarrik etorriko, eskenatokian Arkaitz Mendoza piano-jolearen laguntza izango baitu.  Azaroren 20an, The Jazz Corner taldeak pianoa, bateria, kontrabaxua eta saxofoiaren doinuak nahastuko ditu. Eta hileko azken igandean, ohiko moduan, Araiako Musika Bandak Santa Cecilia eguna ospatuko du.

Abenduaren 11n, aldiz, Erdi Aroko musika jotzen duen talde nafarra Trovadores y Troveros proiektua aurkeztuko du arratsaldeko 20:15ean. Entzunaldi honen azkenaurreko emanaldia abenduaren 18an izango da, herriko bandak Gabonetako Kontzertua eskaintzen duenean. Eta azkenik, abenduaren 19an, Araiako Abesbatzak herriko elizan amaiera emango dio XVIII. Urte-Bukaera Musikalari.

Interaktibitatea zibermedioetan

Gero eta gehiago dira zientzia eta teknologia arloan izandako aurrerapenak, eta hedabideak ez dira atzean geratu nahi. Hortaz, egunkari garrantzitsu gehienak paper hutsa izatetik, irakurlearen interaktibitatea bilatzen duten zibermedio bat izatera pasa dira. Hori dela eta, irakurle horren papera ere dexente aldatu dela esan daiteke, horiek hartzaile pasibo bat izatetik igorle aktibo bat izatera pasa baitira.

Hortaz, zibermedioen interektatibitatea aztertzeko Diario de Noticias de Álava, El País eta nazioarteko The Guardian kazeten edizio digitalak ikertu ditut, eta hauek izan dira atera ditudan ondorio nagusiak:

Lehenik eta behin, egunkari lokalarekin hasiko naiz. Noticiasdealava.com-ek albiste guztiak komentatzeko aukera dauka, horregatik, alde horretan behintzat, irakurlearen parte hartzea bultzatzen duela ematen du. Baina, bestalde, ez du bideoak edota argazkiak igotzeko aukerarik ematen. Hori dela eta, nire ustez, alor horretan hutsune bat du, hedabide lokal bat izanik lan gehiago egin beharko lukeelako.

Zibermedio nazionalarekin jarraituz, Elpais.com-eko taldeak Eskup.com izeneko “hedabide bizia eta irekia” sortu du, interaktibitatea uztartzeko. Eskup.com-aren bidez, irakurleek adituei galdetu edota erantzun diezakete, eta informatzeko edota informatuta egoteko ere erabil daiteke. Bestalde, blogei garrantzia handia ematen die. Gainera, Prisa taldeko beste hedabideetan sortutako blogak eskaintzeaz gain, irakurleari bere bitakora egiteko aukera ematen dio. Eta azkenik,Talentos izeneko atalean, argazkilaritzan, marrazketan, bideogintzan, musikan edota idazten trebeak diren pertsonei beren lanak igotzeko aukera ematen die. Beraz, aukera hauek guztiak eskainita, Elpais.com-ek sarearen beste aldean dagoenaren parte hartzea gogor bultzatzen duela esan daiteke.

Eta ikerketa honekin amaitzeko, aztertu ditudan zibermedio guztien artean, nire aburuz, The Guardian da interaktibitateari garrantzia gutxiena ematen diona. Izan ere, ez du inkestarik, lehiaketarik edota fororik eskaintzen.  

 Ziberkazeta hauek guztiak sare sozialetan, (hala nola, Twitter, Facebook…) topatu daitezke, eta albisteak gorde edota elkartrukatzeko aukera eskaintzen dute. Dena dela, orokorrean, interaktibitatearen arloan, Elpais.com lan handiagoa egiten duena dela ondorioztatu daiteke.

Jirabiraka

Jira eta bira. Horrela dabil Lurrak goizetik gauera, eta gauetik goizera. Jira eta bira. Hori da blog honen izenburua, eta baita nire bizitzak betidanik jarraitu duen norabidea ere. Hortaz, beti zeharo galduta ibili naizela ondorioztatu daiteke.

Egun batean, goizean goiz altxatu, eta gaur ere zerua gris xamar dagoela ikusten duzu. Baina, bat-batean,  espero ez duzun zerbait gertatzen da, eta… kontxo! Orain eguzkia atera dela dirudi, eta izpi horiek zure bizitzan jarraitu beharreko bidea argitzen dute.

Horrela iritsi naiz ni hona. Modu metaforiko batean azalduta, noski! Urte bat lanean eman ondoren, zerbait ikasten jarraitu nahi nuela konturatu nintzen, eta nire buruan hamaika ideia jira eta bira ibili ondoren, azkenean Multimedia Komunikazioa Masterra egitea erabaki nuen.

Modu horretan, berriro ere, ni baino askoz ere eraldatuagoa dagoen unibertsitatera iritsi nintzen. Bai, onartu beharra daukat klaseko lehen egunean handik ihes egitea pentsatu nuela. Baina eraikin berriko mapa esku artean izan barik klasetik korrika ateratzeko gai izango ez nintzela jakinda, ordenagailu aurrean eserita jarraitu nuen. Orduan, masterraren asunto hau patxadaz hartu behar nuela konturatu  nintzen.  

Beraz, bitakora honen jaiotzaren arrazoia master honekin zerikusia du, eta litekeena da bere heriotza ere ikastaro honen amaierarekin lotura izatea. Baina tira, orain ez dugu bukaeran pentsatuko, hau guztia hasi besterik ez da egin eta!